Gobièrnu di Kòrsou a prepará un pakete di sosten ku ta enserá akshonnan di sosten riba tereno finansiero, ekonómiko i sosial-ekonómiko, pa nos poblashon. E pakete akí mester mitigá e konsekuensianan ekonómiko negativo ku e medidanan nesesario pa kombatí e pandemia di COVID-19 ta okashoná.

E akshonnan di sosten akí ta brinda esnan ménos pudiente den nos komunidat un sosten di resiliensia. Na mes momento ta duna un yudansa temporal na e grupo di empresarionan independiente i esnan ku a pèrdè trabou. Banda di esei Gobièrnu ke skapa mas tantu kupo di trabou posibel, brindando dunadónan di trabou un yudansa ku nan gastunan di salario i ofresiendo fasilidatnan di krédito na empresanan.

E sosten pa medio di e pakete aki ta kana via e Fondo di Sosten. Nos ta invitá bo pa tira un bista riba e wèpsait akí pa bo mira ta pa kua akshon di sosten bo ta bini na remarke.

Nos ke yuda bo!