Empresario Individual

1. Ken por bini na remarke pa e medída di sosten temporal pa empresario individual?

E medída di sosten ta destiná solamente pa empresario individual ku ta den problema finansiero dor di e krisis kousá pa COVID-19.

2. Ken ta kai bou di Empresario Individual?

E persona en kuestion mester tin 18 aña òf mayor, ta maneha un empresa chikitu su só (1) òf ta ehersé un profeshon independiente (2). Tambe e tin kontròl por kompletu di e empresa òf e profeshon individual ku e ta ehersé i e ta karga tur rísiko finansiero pa ku esaki.

Por ehèmpel:

• Doño di un Eenmanszaak (ku òf sin empleado)
• Un direktor di un korporashon ku ta poseé más ku 50% di e akshonnan i ku no tin empleado den funshon;
• Shofùr di transporte públiko;
• Shofùr di taksi;
• Ehekutor di Eksposishon;
• Musikante
• Etc.

3. Kua dokumento mi mester pa mi mi por entregá un aplikashon?

1. Sédula (inkluso un pèrmit di estadia válido)
2. Deklarashon di Kámara di Komersio
3. Kuenta Anual mas resién
4. Sifranan di volúmen di entrada
5. Komprobante di gastunan komersial fiho (mas tantu prueba posibel)
6. Resumen di Impuesto entregá (Yanüari te ku Mart 2020)
7. Kopia di datonan bankario

4. Mi mester ta inskribí na Kamara di Komersio i na Ofisína di Impuesto?

Si, bo mester ta inskribí na Kamara di Komersio i na Ofisína di Impuesto. Si esaki no ta e kaso, bo por bini na remarke pa e medída di sosten, si bo ta dispuesto na registrá na Kamara di Komersio i na Ofisína di Impuesto.

5. Kon mi lo risibí e sosten?

Si un empresario individual yena i entregá e formulario Sosten Temporal Empresario Individual (STEI), e por bini na remarke pa sosten finansiero (komplementario) temporalmente. Bo por apliká pa risibí sosten solamente si e krisis di Corona a kausa problema finansiero na bo negoshi i si e total di bo entrada nèto pa motibu di e situashon ta bou di e montante ANG 1.335,-. Bo ta den problema finansiero pa otro motibu? E ora ei bo no ta bini na remarke pa e medída di sosten aki.

6. Kua montante mi por pidi?

Bo por apliká pa sosten temporal pa un periodo máksimo di 3 luna. E sosten lo kompletá bo entrada nèto te na e montante di ANG 1.335,- pa luna. No por entregá un petishon pa risibí pago ku forsa retroaktivo. Esaki ta nifiká ku bo por risibí e sosten temporal for di e momentu (luna) ku bo a entregá bo petishon.

7. Kua akshon mi tin di tuma?

1. Bo ta yena tur pregunta segun berdat. Bo ta yena bo entrada nèto aktual i bo ta ofresé un balorashon di bo entrada nèto segun e periodo pa kua bo ta hasiendo e petishon.
2. Bo ta entregá kopia /scan di tur komprobante (komo anekso digital). Perkurá ku e komprobantenan no falta algu. Ministerio di Desaroyo Ekonómiko (MEO) lo warda bo informashon i komprobantenan.
3. Durante e periodo ku bo ta risibí sosten, bo mester notifiká kada kambio den bo situashon na MEO! Por ehèmpel, si bo entrada bira mas òf bira menos kompará ku e lokual bo a indiká, òf si bo muda, òf si bo situashon familiar a kambia.

8. Despues di kuantu tempu mi lo risibí e sosten?

Yena a formulario di aplikashon por kompleto no ta nifiká ku bo ta bini na remarke outomátikamente pa e sosten temporal. MEO lo evaluá bo datonan i tuma un desishon tokante e aplikashon. Ta posibel ku nos lo pidi pa bo ofresé algun informashon adishonal. MEO lo hasi su esfuerso pa informá bo tokante e desishon denter di un periodo di 2 siman.

9. Lo kontrolá mi datonan?

Si, MEO por kontrolá bo informashon tantu durante e periodo di aplikashon komo despues. MEO por entregá petishon na otro instansia òf persona pa risibí informashon di bo persona ku por ta relevante pa loke ta trata e medída di sosten. Asina MEO por perkurá pa e persona korekto risibí e sosten.
I si durante e kontròl bini dilanti ku bo a risibí di mas? E ora ei lo bo mester paga e montante ku a risibí di mas bèk. Si bo entregá informashon inkorekto intenshonalmente, MEO ta obligá pa eksigí e sosten temporal bèk i alabes MEO por tuma medídanan apropiá.

10. E sosten temporal ta konta komo entrada?

No, e benefísio sosial no ta konta komo entrada pa aña 2020. E págo no ta forma parti di bo entrada total.

11. Ki ta e kondishonnan pa bini na remarke?

E empresario individual ta bini na remarke si:

• Pa motibu di e krisis kousá pa COVID-19 bo entrada (kual ta e volúmen di kompra i benta, di kua a kita e gastunan fího manera gastunan di kompra, hür, pago di awa, koriente i suskripshon) ta bou di 80% di e sueldo mínimo (ANG 1.335);
• E tin 18 aña of mayor;
• E ta biba na Kòrsou;
• E tin e nashonalidat Hulandes òf un státus di estadia válido;
• E empresa ta situá na Kòrsou i e trabounan ta tuma lugá prinsipalmente na Kòrsou;
• E empresa ta aktivo ekonómikamente, menos si esaki no ta posibel dor di e krisis okashoná pa COVID-19;
• E ta kumpli ku e kondishonan legal pa por manehá un empresa própio, manera entre otro ku e empresa ta registrá den e registrashon di komersio di Kamara di Komersio, e tin un nùmber di CRIB pa empresa i/òf e ta poseé di e pèrmitnan nesesario;
• Si e no ta registrá na Kamara di Komersio i/òf na Ofisína di Impuesto, e lo tuma e pasonan nesesario i registrá na tantu Kamara di Komersio komo Ofisína di Impuesto;
• Pa loke ta trata un direktor di un korporashon, e só mester ta den funshon di direktor i tin den su posishon por lo menos 50% di e akshonnan;
• Tur Eenmanszaak i/òf korporashon mester entregá nan impuesto mensualmente i mester perkurá ku e deklarashon di impuesto for di Yanüari te ku Mart 2020 mester ta entregá. (Esaki no ta konta pa negoshinan ku a apliká pa e areglo pa empresa chikí);
• No tin situashon kaminda nesesidat pa eksklushon lo bin dilanti. Por ehèmpel, no tin situashon kaminda e empresario individual:
  – Ta detení;
  – Ta den servisio militar;
  – Aktualmente òf pa e próksimo 3 lunanan lo ta residá den eksterior;
  – Tin un edat bou di 21 aña i ta residá den un institushon;
  – Aktualmente ta ku ferlòf no-pagá;
  – Tin un edat bou di 27 aña i ta studiando ku sosten di studiefinanciering;
  – A hasi petishon pa deklará bankarota (personal) òf a hasi un petishon di suspenshon di pago entre 2019 te ku Mart 2020.

12. Pa resumí

• Yena bo informashon personal i añadí dokumentonan ku ta relevante
• Yena e informashon relatá na bo negoshi i añadí dokumentonan ku ta relevante
• Spesifiká klaramente e largura di e periodo ku bo mester di e ‘STEI’. Esaki, si akaso mester paga e montante ku forsa retroaktivo (for di 1 di Aprel) òf for di e fecha ku a entregá e petishon. Seguidamente yena e nòmber di bo banko, bo number di kuenta bankario, e nòmber di e benefisiario i añadí e delaster komprobante di e datonan bankario.
• Yena bo entrada di empresa nèto i e entradanan di otro fuentenan si esaki ta relevante, i splika klaramente dikon e entrada nèto di bo negoshi a baha asina.
• Kontrolá e informashon ku bo a yena i pèrkurá ku bo a añadí tur dokumento relevante, i despues manda e petishon.