Empresanan (supsidio pa salario)

Kompanianan por apliká pa kompensashon solamente si e aktividatnan kardinal di nan kompania ta tuma lugá den un di e sektornan menshoná riba e Lista di Sektor; lo kontrolá esaki a base di e registro di kompania di Kámara di Komèrsio. Un dunadó di trabou ku ta premirá pèrdida di entrada (un mínimo di 25%) por entregá un petishon na SVB pa risibí un kompensashon pa luna di novèmber i desèmber 2020 pa gastunan salarial.

Dependé e desaroyonan, e areglo por kontinuá pa e periodo ku ta sigui. E porsentahe pa kompensashon pa loke ta trata e suma di suèldu ta dependé di e porsentahe di pèrdida di entrada ku e dunadó di trabou ta premirá, segun e siguiente deskripshon:

Kompensashon = 71.6% di e porsentahe di e pèrdida ku ta premirá multipliká pa e suèldu total

E suèldu total ta igual na e sumo di suèldu OV di e luna anterior pa kua e dunadó di trabou a entregá un deklarashon i kual e la paga, i añadí na esaki, es suèldu segun SVB registrá pa 15 di yüli 2019 di e direktornan menshoná den nan statüt, ku ta den servisio aktualmente ku un máksimo di e suèldu máksimo pa dia konforme ordenansa di OV (ANG 5781,- pa luna). E bahada di entrada ta e diferensia entre e entrada den e luna novèmber i desèmber 2019 i e entrada ku ta premirá pa luna di novèmber i desèmber 2020. Kompanianan ku a lanta despues di 1 di novèmber i despues di 1 di desèmber 2019 ta konta komo periodo di referensia e luna ku a lanta e negoshi te na Febrüari 2020 (proporshonalmente). Kompanianan ku ta eksonerá pa loke ta trata impuesto i kompanianan ku a eksperensia un subida sustantivo di nan entrada for di novèmber i desèmber 2019 por inkorporá un otro periodo di referensia òf método, despues ku a konsultá ku e Helpdesk di NOW.

Ehèmpel:

• Bahada di entrada primaria ta 90%; kompensashon = 71.6%* 90% = 64 % di e suma di entrada (loonsom);
• Bahada di entrada primaria ta 75%; kompensashon = 71.6%* 75% = 54 % di e suma di entrada (loonsom);
• Bahada di entrada primaria ta 50%; kompensashon = 71.6%* 50% = 36 % di e suma di entrada (loonsom);
• Bahada di entrada primaria ta 25%; kompensashon = 71.6% * 25% = 18% di e suma di entrada (loonsom).

Si akaso e bahada di entrada real ta mas abou ku a primaria i konsekuentemente e kompensashon tabata muchu haltu, lo rekobrá e diferensia na final di e periodo di kompensashon for di e dunadó di trabou, sin but.

Den e kompensashon di NOW tambe tin inkluí un kompensashon pa e kontribushon di dunadó di trabou AOV/AWW. E eksonerashon di entregá di e kontribushon di dunadó di trabou pa AOV/AWW komo parti di e ‘Alivio 1’medidanan ta vense e ora ei.

Tur dunadó di trabou ku ta skohe pa hasi uso di e medida di urgensia aki, durante e periodo ku ta hasi uso di e areglo, ta obligá na paga tur su empleadonan ku ta registrá na SVB, i ta obligá na no entregá petishon di retiru òf ehekutá esaki.
Esaki ta un adaptashon importante di e areglo for di luna di mei. No a apliká e medida aki den luna di aprel pa empleadonan ku ta tin kontrato di 0 ora, pero pa loke ta trata e definishon di e palabra, ta difísil pa definí e nifikashon di e terminologia aki. Pues for di mei ta konta ku lo inkorporá tur empleado ku ta registrá na SVB den e aplikashon pa supsidio di suèldu. Pa empleadonan ku un kontrato di 0 ora ku ta registrá na SVB ku un salario te na ANG 1047,- bruto (ANG 1000,- nèto) lo kubri tur gastu (inkluso e kontribushon di dunadó di trabou). Esaki pa prevení ku ta forsa empleadonan pa entregá petishon pa sosten pa persona ku a pèrdè trabou, miéntras ku nan dunadó di trabou ta risibí supsidio di suèldu. Riba e salario di ANG 1047,- bruto e supsidio pa suèldu mínimo lo ta ANG 1298,- pa luna.

For di luna di mei kompanianan ku ta risibí supsidio di suèldu mester yega na un palabrashon ku nan empleadonan (ku aprobashon mutuo) tokante e kontribushon di 20% riba e suèldu total bruto pa kua ta paga supsidio di salario. Esaki ta e suèldu total bruto multipliká ku e bahada di entrada ku ta premirá, kual ta e montante ku e petishon ta basá riba dje. Por ehekutá e kontribushon den forma di redukshon temporal di salario bruto (aki por implementá bahada di oranan di trabou), ku un mínimo di suèldu mínimo (ANG 1667,- pa luna) pa empleadonan den servisio fiho ku ta traha full-time, òf dor di entregá dia di fakansi òf otro tipo di kompensashon. Tur empleado mester kontribuí durante e periodo ku e kompania ta risibí supsidio di suèldu. Redukshon riba e salario bruto mester tuma lugá na mesun sistema ku ora un persona ta den ‘ziektewet’. E suèldu di ZV/OV i e primanan di ZV/OV ta permanesé igual, pero por adaptá e salario bruto temporalmente. (primi aki pa un link pa e ehèmpel).

E dunadó di trabou mester paga impuesto i prima sosial normal. Un di e kondishonnan pa por risibí kompensashon den un periodo ku ta sigui, ta ku esakinan ta pagá (òf ku tin un areglo di pago). Ademas e dunadó di trabou NO por pidi pa kompensashon pa bahada di entrada pa motibunan ku no ta relatá na e krísis di COVID-19.

E akuerdo ta konta solamente pa empleadonan ku ta registrá den e sistema di SVB for di e fecha 28 di febrüari 2020 i direktornan statutario ku ta registrá for di 15 di yüli 2019; i ku no a sali for di servisio, eventualmente agregá ku empleadonan pa kua e dunadó di trabou tabata paga primanan ZV/OV, pa medio di prosesonan ofishal di SVB. E areglo no ta aplikabel pa stazjèr, akshonista ku no ta den servisio, empresario ku negoshi propio (Eenmanszaak), direktornan statutario di kompanianan sin empleado i kompanianan gubernamental.

Bo por entregá bo petishon pa bini na remarke pa e areglo di NOW pa luna di novèmber i desèmber for di djamars 24 di novèmber 2020, 4 or di atardi te ku djamars 01 di desèmber 2020, 4 or di atardi. Pa por apliká pa promé biaha, lo bo tin mester di lo siguiente:

1. Deklarashon i pago di Impuesto (OB) pa òktober i novèmber 2019;
2. Kantidat di empleado den servisio for di 28 di febrüari 2020;
3. Deklarashon i pago di suèldu total OV pa òktober i novèmber 2020;
4. Lista di nòmber, fam, number di sédula, suèldu segun SVB, kantidat di dia di trabou pa siman di tur empleado ku tabata den servisio riba 31 di òktober 2020;
5. Lista di nòmber, fam, number di sédula, fecha ku a drenta servisio, fecha final di kontrato i grupo di suèldu mensual di tur empleado ku kontrato di 0 ora ku tabata den servisio 28 febrüari 2020 i ta den servisio ainda;
6. Lista di nòmber, fam, number di sédula di e direktornan menshoná den bo statüt riba 15 di yüli 2019;
7. Lista di nòmber i number di sédula di direktornan menshoná den statüt ku a sali for di servisio despues di 15 di yüli 2019.
8. Kopia di informashon bankario pa verifiká e number di kuenta.

Kompanianan ku di aprel te ku òktober 2020 ya a apliká pa supsidio di suèldu òf ya a risibí supsidio pa suèldu kaba, outomátikamente lo risibí un invitashon ku ta konsistí di un URL-link ku lo dirigí nan direktamente pa e formulario di aplikashon. Nan mester yena solamente algun informashon den e formulario aki i mester añadí e siguiente informashon digital:

1. Payroll pa luna di òktober i novèmber 2020;
2. Komprobante di pago di salario pa luna di òktober i novèmber 2020;
3. Lista di nòmber, fam, number di sédula, suèldu segun SVB, kantidat di dia di trabou pa siman di tur empleado ku tabata den servisio riba 31 di òktober 2020;
4. Lista di nòmber, fam, number di sédula, fecha ku a drenta servisio, fecha final di kontrato i grupo di suèldu mensual di tur empleado ku kontrato di 0 ora ku tabata den servisio 28 febrüari 2020 i ta den servisio ainda;
5. Komprobante di pago di OB, LB i primanan sosial pa luna di òktober i novèmber 2020 (solamente si no a entregá e deklarashon via medio elektróniko);
6. Komprobante di un areglo entre dunadó di trabou i trahadónan pa loke ta trata e entrega di 20% i e forma di entrega (p.e. 20% riba salario bruto òf dianan di fakansi ku ta ku ta wòrdu tumá). Esaki por ta pa medio di 1 dokumento kaminda e dunadó di trabou i tur e trahadónan ta firma.

E kompanianan mester entregá i paga nan OB, LB i primanan sosial promé ku nan hasi un petishon. Si no nan NO ta bini na remarke pa supsidio di salario.

Despues ku a risibí e kompensashon, e aplikante ta obligá na yena un kuestionario regularmente ku Ministerio di Desaroyo Ekonómiko lo manda; esaki ta trata e Plan di Rekuperashon [Recovery Plan] ku a referí na dje anteriormente.

Tin tres (3) Helpdesk disponibel pa aplikante i empleadonan ku ta kai bou di e areglo di NOW:

1. Dunadó di trabou ku durante e proseso di aplikashon ke drenta den kontakto pa risibí informashon tokante e repartishon di sektor òf tokante periodo/método di referensia pa entrada ku ta desviá. Nan por tuma kontakto pa medio di  now@fondodisosten.org.
2. Dunadó di trabou ku for di dos (2) dia despues di e periodo ku por entregá e petishon tin pregunta tokante pago di e supsidio di suèldu. Nan por tuma kontakto pa medio di subsidienow@svbcur.org òf via number di telefòn 4344199.
3. Empleadonan ku ta di opinion ku nan dunadó di trabou no ta tene nan mes na e kondishonnan relatá na e areglo di NOW, por tuma tuma kontakto pa medio di sostenemi@fondodisosten.org.